Programi i strehimit social vijon të mbetet një nga shtyllat kryesore të politikave publike për mbështetjen e familjeve dhe individëve në nevojë, me synimin për të garantuar akses në strehim të përshtatshëm dhe të përballueshëm për shtresat që nuk arrijnë të përballojnë kostot e tregut të banesave.
Sipas të dhënave zyrtare të Ministrisë së Financave, objektivi afatmesëm i këtij programi është që deri në vitin 2030 të sigurojë strehim për rreth 35 mijë individë dhe familje që kanë aplikuar për përfitim dhe ndodhen në vështirësi ekonomike.
Programi parashikon një kombinim instrumentesh financiare dhe sociale, që synojnë jo vetëm sigurimin e një banese, por edhe përmirësimin e kushteve të jetesës dhe integrimin social të përfituesve.
Për vitin 2026, buxheti i planifikuar për financimin e masave të strehimit social arrin në rreth 1,25 miliardë lekë. Ky fond do të përdoret për disa skema mbështetëse, të cilat adresojnë kategori të ndryshme përfituese.
Një nga masat kryesore është pagesa e bonusit të qirasë, nga e cila pritet të përfitojnë rreth 1900 familje. Për këtë qëllim është parashikuar një fond prej 200 milionë lekësh, që synon të lehtësojë barrën financiare të qirasë për familjet me të ardhura të ulëta.
Paralelisht, do të zbatohen skemat e vetëinvestimeve për përmirësimin e kushteve të jetesës, të orientuara drejt grave dhe burrave nga grupet sociale në nevojë. Në kuadër të kësaj mase, parashikohen mesatarisht 350 familje përfituese, me një kosto totale prej 350 milionë lekësh. Këto skema synojnë të nxisin përfshirjen aktive të përfituesve në përmirësimin e banesave dhe kushteve të jetesës.
Një tjetër komponent i rëndësishëm i programit lidhet me subvencionimin e qirasë për familjet e shpronësuara nga projekti i Unazës së Madhe të Tiranës. Për vitin 2026, parashikohet mbështetja për 92 familje përfituese, me një fond prej 10 milionë lekësh.
Vëmendje i kushtohet edhe grupeve më të cenueshme, si gratë dhe vajzat e dhunuara, si dhe familjet me një prind. Kostoja e parashikuar për strehimin social të rreth 2000 grave dhe vajzave nga këto kategori arrin në mbi 132 milionë lekë.