Studimi synonte të zbulonte se si virusi Covid-19 mund të shkaktojë pas negativizimit simptoma që zgjasin shumë të tilla si lodhje të thellë, mjegull në tru, dhimbje koke, ethe dhe gulçim.
Instituti Kombëtar i Shëndetësisë njoftoi mbi përfundimin e fazës së parë të studimit të tij katër-vjeçar, që kushtoi një miliard dollarë, duke zbuluar pse disa të mbijetuar nga Covid-19 kanë simptoma afatgjata, edhe pas çrrënjosjes së virusit.
Informacioni që del nga studimi do të përmirësojë gjithashtu njohuritë tona për biologjinë themelore se si njerëzit shërohen nga infeksionet dhe do të përmirësojë kuptimin tonë të sindromave të tjera kronike post-virale dhe sëmundjeve autoimune.
Studimet e fundit kanë treguar se gratë shfaqin më shumë simptoma post-Covid sesa burrat.
Disa nga simptomat që zgjasin më gjatë përfshijnë lodhje, gulçim, dhimbje koke, rrahje të shpejta të zemrës, ndryshime në shije dhe erë, dhe mjegullën e trurit. Përveç biologjisë, mund të ketë baza të thella sociologjike ose kulturore që shpjegojnë ndarjen gjinore; gratë thjesht mund të jenë më të gatshme të kërkojnë kujdes mjekësor dhe të flasin hapur për simptomat.
Sipas një studimi tjetër të fundit, simptoma më e theksuar në të gjitha rastet post-Covid është lodhja. Sidoqoftë, një veçori është se kjo simptomë vazhdon jo vetëm në raste të rënda të Covid-19, por edhe në raste të lehta të sëmundjes. Derisa të ketë një fazë vaksinimi për të rriturit e rinj, zgjidhje është që të vazhdojmë të marrim masa paraprake kundër virusit. Jo vetëm simptomat afatshkurtra duhet të shqetësojnë njerëzit, por edhe potenciali për pasoja afatgjata.
Sakaq, 30% e pjesëmarrësve raportuan kushte më të këqija shëndetësore dhe cilësi të jetës, krahasuar me atë se si ndiheshin para infeksionit.
Për më tepër, 8% thanë se nuk ishin në gjendje të kryenin si zakonisht punët e përditshme. Kjo përfshinte paaftësinë për të ngritur sende të rënda ose për të qëndruar apo ecur pa ndihmë për më shumë se një periudhë të shkurtër kohe. Me numrin global të rasteve Covid-19, nëse vetëm një përqindje e vogël e tyre përfundojnë me simptoma të vazhdueshme, ky është akoma një grup i madh njerëzish jeta e të cilëve është përmbysur. Studiuesit theksojnë se Covid i gjatë mund të ketë pasoja shëndetësore dhe ekonomike në të gjithë botën që do të duhet të adresohen.