Ministria e Jashtme ka reaguar për sulmet e Rusisë në Ukrainë.
“Sulmet e Rusisë kundër civilëve në disa qytete të Ukrainës, përfshirë edhe Kievin, janë një akt i qartë terrorist. Kjo është natyra e vërtetë e luftës së Rusisë dhe Putinit kundër Ukrainës. Brutaliteti dhe terrori nuk e kanë ndihmuar aspak Rusinë përballë rezistencës heroike të Ukrainës. As këtë herë nuk do të ndodhë. Shqipëria qëndron përkrah Ukrainës ndaj këtij agresioni të paligjshëm”, thuhet në reagim.
Të paktën dhjetë persona janë vrarë dhe 60 të tjerë janë plagosur në sulmet ruse, që goditën qytetet ukrainase mëngjesin e 10 tetorit.
Në Moskë, presidenti rus, Vladimir Putin, tha se sulmet në Ukrainë ishin kundërpërgjigje ndaj veprimeve të Kievit, që ai i cilësoi “terroriste”, përfshirë edhe sulmin gjatë fundjavës në urën që lidh Rusinë me Gadishullin e aneksuar të Krimesë.