Sot në Prefekturën e Dibrës është organizuar një takim për sigurinë rrugore dhe masat e marra nga institucionet për përmirësimin e gjendjes së tyre, disiplinimin e automjeteve, vendosjen e sinjalistikës horizontale dhe vertikale.
Prefekti i Qarkut Dibër, Nexhbedin Shehu, tha se situata dimërore, megjithëse mjaft e vështirë, u përballua mirë nga bashkitë Dibër, Mat, Bulqizë e Klos. “Pati një angazhim serioz të bashkive, ndërmarrjeve dhe subjekteve sipërmarrëse për përballimin e situatës dimërore”, nënvizoi Prefekti.
Ndërkohë pjesmarrësit në takim, sidomos ato të bashkisë Mat, u shprehën të shqetësuar në lidhje me rregullimin e qarkullimit rrugor në qytetin e Burrelit. Ata nënvizuan se ka familjarizim mes punonjësve të sektorit të qarkullit rrugor dhe atyre që shkelin Kodin Rrugor.
Zyrtarët theksuan se në disa raste janë fëmijët apo të afërmit e punonjësve të Policisë Mat apo të autoriteteve lokale që shkaktojnë probleme për qytetarët. “Mjetet e tyre nuk janë të pajisura me dokumentacionin e kërkuar. Lëvizin me shpejtësi tej normave të lejuara në qendër të qytetit, madje nuk u binden specialistëve të qarkullimit. Drejtuesit e Policisë Mat duhen të marrin masa të menjëhershme për disiplinimin e stafit dhe familjarëve të tyre, deri në largim nga puna në rast se nuk arrijnë të frenojnë abuzuesit në mjedise publike”, nënvizuan pjesmarrësit në mbledhjen e zhvilluar në Prefekturë.