Donald Trump mund të shtyjë afatin e pezullimit të tarifave doganore që pritej të hynin në fuqi më 9 korrik. Lajmi u bë i ditur nga zëdhënësja e Shtëpisë së Bardhë, Karoline Leavitt, gjatë një konference për shtyp. Ajo sqaroi se data 9 korrik “nuk duhet konsideruar si përfundimtare”, pasi “bëhet fjalë për një vendim që i takon presidentit”.
Tarifat që do të vendoseshin mbi mallrat që vijnë nga Bashkimi Evropian ishin pezulluar që në fillim të qershorit, pas një bisede telefonike mes presidentit amerikan Donald Trump dhe presidentes së Komisionit Evropian, Ursula von der Leyen. Trump kishte njoftuar për vendosjen e këtyre tarifave me rastin e “Ditës së Çlirimit” në shkurt, por që nga ajo kohë hyrja në fuqi e masës është shtyrë disa herë. Tarifat mund të arrinin deri në 50% mbi mallrat evropiane.
Evropa, ndërkohë që sot janë mbledhur krerët e shteteve anëtare të BE-së, po pret një kundërpropozim për marrëveshje nga SHBA. Von der Leyen kishte si objektiv eliminimin e plotë të tarifave reciproke, por ky synim duket gjithnjë e më i vështirë. Në samitin e NATO-s në Hagë, kryeministrja italiane Giorgia Meloni ishte shprehur e hapur për një marrëveshje që parashikon tarifa 10%, duke e quajtur këtë masë “jo veçanërisht të rëndë”.