Një konlfikt me armë zjarri ka tronditur gjatë natës lagjen Crown Heights në Brooklyn, duke lënë tre persona të vrarë dhe tetë të plagosur. Ngjarja ndodhi në një sallë pritjeje të mbushur me njerëz, pas një grindjeje të nisur brenda lokalit “Taste of the City”.
Sipas komisioneres së Policisë së Qytetit të New Yorkut, Jessica Tisch, disa telefonata për të shtëna në këtë vend u regjistruan në numrin 911 rreth orës 3:30 të mëngjesit. Policia mbërriti disa minuta më vonë dhe gjeti 11 persona të qëlluar me armë brenda sallës së pritjes.
Tre viktimat u shpallën të vdekura në vendngjarje: një burrë 27-vjeçar, një burrë 35-vjeçar dhe një person tjetër, mosha e të cilit nuk është bërë e ditur. Viktimat e plagosura, tetë meshkuj dhe tre femra, janë të moshës nga 27 deri në 61 vjeç dhe u dërguan menjëherë në spitalet lokale. Gjendja e tyre shëndetësore nuk është bërë publike deri në mëngjesin e së dielës.
Hetuesit gjetën të paktën 36 gëzhoja dhe një armë zjarri pranë vendngjarjes, të cilën po përpiqen ta lidhin me incidentin. Policia beson se në të shtënat kanë qenë të përfshirë disa persona, por deri më tani nuk ka arrestime.
Komisionerja Tisch e cilësoi ngjarjen si “një anomali” në kontekstin e uljes së incidenteve me armë në qytetin e Nju Jorkut gjatë shtatë muajve të fundit. Megjithatë, ajo theksoi se kjo nuk e zvogëlon rëndësinë e ngjarjes tragjike.
Incidenti vjen pas disa të shtënave masive në qytet gjatë këtij viti, përfshirë edhe një sulm në Times Square dhe një tjetër në një rrokaqiej në Manhattan.
Sipas të dhënave të Arkivit të Dhunës me Armë, në Shtetet e Bashkuara janë regjistruar deri tani 272 të shtëna masive gjatë këtij viti, të cilat përkufizohen si ngjarje ku plagosen katër ose më shumë persona, përveç autorit.