Presidenti i Kosovës Hashim Thaçi, dëshmoi në çështjen gjyqësore, “Syri i Popullit”, e cila u zhvillua me dyer të mbyllura me kërkesë të kreut kosovar të shtetit, pasi sipas tij rrezikohej sekreti shtetëror. Thaçi ishte dëshmitari i fundit dhe pas përfundimit të seancës, avokati i Sadri Ramabajës, Ramiz Krasniqi e përsëriti se do të bëjë kallzim penal ndaj Kadri Veselit. Sipas tij, sjellja e kryeparlamentarit gjatë seancës së sotme, dëshmoi se gjykatat nuk janë të pavarura.
“Sot ka ndodhur diçka e çuditshme, kryeparlamentari i Kosovës shkel me dy këmbët ligjin. Kryeparlamentari i Kosovës sulmon të akuzuarit. Kryeparlamentari i Kosovës fyen të akuzuarit. Kryeparlamentari i Kosovës i fyen edhe mbrojtësit e tyre. Andaj ky nuk është nivel i një kryeparlementari dhe kjo flet mjaft se në çfarë gjendje jemi. Është vërtetuar që ky gjyqësor me të vërtetë nuk është i pavarur. Ky gjyqësor nuk guxon t’ia tërheq vërejtjen kryeparlamentarit. Ky gjyqësor tregoi që kryeparlamentari i Kosovës është më i madh se gjykatësit”, tha ai.
Krasniqi shtoi se për politikanët që udhëheqin, Vetëvendosja është obsesion.
“Unë do të paraqes kallzimin penal në momentin që do e marr proces verbalin e këtij shqyrtimi, sepse në deklaratën e Kadri Veselit ka shpifje të natyrës më të rëndë që mund t’i bëjë një kryetar i parlamentit ndaj të akuzuarit. Shpifje pa asnjë bazë. Shpifje drejtuar ndaj Ramabajës dhe Vetëvendosjes dhe unë i thashë edhe presidentit që me gjasë Vetëvendosje është obsesion i këtyre njerëzve që udhëheqin politikën”. Seanca e radhës do të mbahet me 25 janar.