Një 34-vjeçar është vënë në pranga pasi theu masën e sigurisë “arrest në shtëpi” dhe mashtroi një qytetare duke u prezantuar si agjent imobiliar.
Gjatë ndalimit, ai u kap duke qarkulluar me një pistoletë sportive në automjet, ndërsa në banesë iu gjetën edhe një palë targa të vjedhura.
Operacioni u zhvillua pas kallëzimit të një shtetaseje, e cila raportoi se kishte dhënë një shumë parash për t’i gjetur një banesë me qira, por ishte mashtruar. Pas veprimeve të shpejta hetimore, specialistët e Krimeve Ekonomiko-Financiare, së bashku me Forcën e Posaçme “Shqiponja”, identifikuan dhe arrestuan shtetasin A. G., 34 vjeç, banues në Tiranë.
Çfarë u zbulua gjatë kontrollit?
Në automjetin e tij, në rrugën “Kastriotët”, u gjet një pistoletë sportive e mbajtur pa leje;
Në banesën e 34-vjeçarit u sekuestrua një palë targash të vjedhura.
Verifikimet e mëtejshme treguan se ai ishte nën masën e sigurisë “Arrest në shtëpi”, për veprën penale Dhuna në familje, të cilën e kishte shkelur.
Materialet i janë dërguar Prokurorisë së Tiranës për procedurat e mëtejshme ligjore.