Policia e Elbasanit ka finalizuar me sukses operacionin policor të koduar “Cooperation”, pas kapjes në flagrancë të një 19-vjeçari që theu masën e sigurisë “Arrest në shtëpi” dhe kreu një vjedhje.
Erald Brahja, i dënuar më herët për vjedhje dhe nën masën e arrestit shtëpiak, dyshohet se natën e 14 korrikut vodhi një automjet në lagjen “Emin Matraxhiu” të Elbasanit, në pronësi të shtetases Xh. Sh.
Pas njoftimit për vjedhjen, shërbimet e Komisariatit të Policisë Elbasan u angazhuan menjëherë në identifikimin e autorit. Në bashkëpunim me Policinë e Tiranës, i riu u lokalizua dhe u arrestua në rrugën “Kastriotët” në kryeqytet.
Gjatë kontrolleve rezultoi se E. B. drejtonte automjetin e vjedhur pa leje drejtimi. Mjeti u sekuestrua në cilësinë e provës materiale.
Në përfundim të veprimeve hetimore, i riu u arrestua për veprat penale: “Largimi i të burgosurit nga vendi i qëndrimit”, “Vjedhja” dhe “Drejtimi i automjeteve në mënyrë të parregullt”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.