Lideri i opozitës, Sali Berisha, u bëri sot thirrje të rinjve shqiptarë gjatë takimit të radhës të Foltores dedikuar FRPD-së, që nesër më 24 janar, në protestën e madhe kombëtare të mblidhen në Tiranë dhe ti “përvishen regjimit” për “ta rrëzuar pushtetin” e Ramës, që e cilësoi diktatura e dytë pas asaj të Enver Hoxhës.
Ai mori për analogji lëvizjet studentore të vitit 1990, si dhe atë kundër armëve kimike më shumë se një dekadë më parë, duke nënvizuar se “lëvizjet rinore janë nukleare” dhe rrëzojnë regjimet. Kreu i selisë blu u shpreh se me Ramën kryeministër është faktuar se nuk bëhen zgjedhje.
“Ky është momenti për ta rrëzuar regjimin. Nuk ka zgjedhje me të. Ne faktuam se me të nuk ka zgjedhje. Thirrja ime është kjo, të bashkojmë sa më shumë rreth vetes, shoqe dhe shokë, nuk ka asgjë më të fuqishme se një lëvizje rinore, e të rinjve, është fuqi nukleare. Dhe e kanë provuar një herë studentët shqiptarë, unë kam besim se do e provojnë përsëri. Po ashtu sikur e përmbysën dhe e kllaposën gjimnazistët për armët kimike. Ndaj duhet të angazhohemi në një mision”, tha ai, teksa i përgjigjej pyetjeve të bëra nga të rinjtë e pranishëm në bashkëbisedim.
Pyetjes së çfarë e motivonte më shumë në jetë, ai u përgjigj:
“Padyshim përmbysja e kësaj diktature. Nuk ka më të keqe më të madhe se sa kjo diktaturë”.
Berisha e krahasoi kryeministrin Edi Rama me Nikola Pashiçin e Serbisë, duke iu referuar një miku të tij gjerman për etiketimin e kreut të mazhorancës shqiptare.
“Ky është kryeministri më i mirë i Serbisë pas Pashiçit. Ndaj t’i përvishemi dhe ta nxjerrim nga pushteti një ditë dhe më parë. Alternativa e PD pas fitores është ajo e ëndrrës së të rinjve shqiptarë, që është projekti i tyre. T’i sigurojmë jetë dinjitoze në vendin e vet, që të realizojnë ëndrrën e tyre”, vijoi ai.
Kryedemokrati apeloi në fund të fjalës së tij se fati i vendit varet nga mbushja e sheshit dhe rrugëve të Tiranës nga të rinjtë.
“Sot fati i Shqipërisë përcaktohet në rrugët dhe sheshet e Tiranës, përcaktohet nga të rinjtë”, përfundoi ai.