Një fëmijë 9-vjeçar përfundoi për mjekim në spital i plagosur në kokë, pasi sendi i fortë i fluturuar nga ballkoni në mënyrë të papërgjegjshme nga një vajzë e re, e ka goditur dhe ngjarja mund të pëfundonte edhe në tragjedi.
Policia e Tiranës njoftoi sot (16 qershor) se ka marrë nën procedim penal në gjendje të lirë të dyshuarën, kurse vogëlushi ndodhet pa rrezik jete. Ngjarja ka ndodhur në zonën e Shkozës.
“Specialistët për Hetimin e Krimeve të Komisariatit të Policisë Nr. 1 referuan materialet në Prokurori, ku nisi procedimi në gjendje të lirë për shtetasen K. H., 20 vjeçe, pasi në Shkozë, dyshohet se aksidentalisht ka hedhur nga ballkoni i banesës një send të fortë dhe për pasojë është dëmtuar një i mitur 9 vjeç, i cili mori ndihmë mjekësore në spital”, bëri me dije policia e kryeqytetit.
Gjatë marrjes në pyetje, vajza e dyshuar tha se ngjarja kishte ndodhur aksidentalisht dhe se nuk e kishte parë fëmijën që po kalonte poshtë.