Arben Gjeci është 35-vjeçari nga fshati Zall-Bastar, i cili është dërguar mbrëmjen e djeshme në spitalin e Traumës me plagë të shumta në kokë, ku dhe ka ndërruar jetë. Për këtë ngjarje të rëndë policia nuk ka dhënë asnjë informacion zyrtar, deri në momentin që u bë publike në media. Ndërkohë që po hetohet nëse është aksidentale apo e qëllimshme.
Në redaksinë e faxweb.al një qytetar informoi për ngjarjen, ku shkruante se 35 vjeçari është goditur mbrëmjen e kaluar me mjete të forta dhe është lënë pa ndjenja në fshatin Zall-Bastar të Tiranës. Sipas tij ai është gjetur nga kalimtarë rreth orës 22, dhe më pas është dërguar me urgjencë në spitalin e Traumës në Tiranë, ku ka ndërruar jetë për shkak të plagëve të marra.
Ndërkohë pas interesimit të gazetarit të Fax News, Sokol Dema, policia ka bërë të ditur se 35-vjeçari dyshohet se ka rënë nga lartësia. Megjithëse për të sqaruar rrethanat e ngjarjes vijojnë hetimet nga blutë e kryeqytetit.