”Titan” është titulli i ri i këngës së Besa Kokëdhimës, që do të përfaqësojë Shqipërinë në Eurovision 2024. Ripërpunimi është goxha i madh, pasi kemi të bëjmë një këngë pothuajse ndryshe nga ajo që fitoi në Festivalin e Këngës. Por emocionet e ngjallura nga zëri i Besës mbeten të paprekura, edhe pse kënga ka pësuar një transformim, me një orkestrim të ri dhe tekst të ri në anglisht.
“Titan” është kompozuar nga vetë Besa në bashkëpunim me Kledi Bahitin dhe teksti nga Gia Koka. Videoklipi dhe kënga në total është nën drejtimin e një ekipi turk. Besa është e përgatitur për të rrezikuar. Që në fillim ajo e bëri të qartë se synonte të rinovonte këngën e saj. Rindërtimi është tërësisht në anglisht, me qëllim përcjelljen e mesazhit në mënyrë më efektive. Besa është shprehur në rrjetet sociale se kënga ka evoluar ndjeshëm nga versioni fillestar dhe dëshiron që të gjithë ta kuptojnë tekstin e saj prekës.
“E di që është shumë më pak e rrezikshme ta mbash në shqip. Edhe unë e dua shqipen. Por kënga është rritur, rinovimi është më i madh dhe unë jam krenar për të. Unë dua që TË GJITHË që e dëgjojnë këngën të jenë në gjendje të kuptojnë dhe të ndjehen të përfshirë. Nuk kam frikë të dështoj pasi e di që kam bërë më të mirën time”.
Rindërtimi synon të rrisë koherencën e këngës, duke eliminuar kalimet e papritura midis pjesëve të ndryshme. Duke mbajtur fokusin në vokalin e fuqishëm të Besës, kënga mori thellësi dhe ngjyra, duke e bërë më të lehtë performancën në skenën e Eurovizionit. Ndryshe nga Festivali i Këngës, ku ka një orkestër live, Besa do të ketë vetëm këngëtarë mbështetës dhe sfond në Eurovizion; kështu, ka të ngjarë që rinovimi ta ketë marrë në konsideratë edhe këtë.
E rëndësishmja është se kënga ruan ende disa elemente autentike shqiptare, duke ruajtur autenticitetin e saj, duke tërhequr gjithashtu një audiencë më të gjerë.