Një anije cisternë me flamur rus, që lundronte nga Rusia drejt Gjeorgjisë dhe ishte ngarkuar me vaj luledielli, u sulmua pranë brigjeve turke.
Ngjarja ndodhi rreth 80 milje larg bregdetit të Turqisë, njoftoi Ministria e Transportit dhe Infrastrukturës e vendit.
Të 13 anëtarët e ekuipazhit të “Midvolga 2” shpëtuan pa lëndime. Sipas ministrisë turke, anija nuk ka kërkuar ndihmë dhe po vazhdon lundrimin drejt Sinopit.
Disa ditë më parë, dronë ukrainas goditën dy anije ruse pranë brigjeve turke. Më herët, presidenti turk Recep Tayyip Erdogan deklaroi se sulmet ndaj anijeve tregtare në Detin e Zi janë të papranueshme dhe bëri thirrje për vetëpërmbajtje nga të gjitha palët.