Kushtet në veriperëndim të Sirisë janë të tmerrshme pas tërmetit shkatërrues të së hënës. Më shumë se një mijë persona kanë humbur jetën dhe qindra të tjerë janë plagosur. Dëshmitarët okularë kanë thënë për CNN se shumë të mbijetuar po flenë jashtë nëpër rrugë në të ftohtë.
Gjithashtu edhe burimet janë të kufizuara për të trajtuar të plagosurit. Shumë spitale në zonë nuk janë të përgatitur për urgjenca. Një drejtor OJQ-je, Dr. Mostafa Edo, i cili ka jetuar në Idlib për tre vitet e fundit, e kaloi të hënën duke shpërndarë ndihma në spitalet në të gjithë rajonin veriperëndimor të Sirisë.
“Spitalet tani kanë filluar të vuajnë nga ndërprerjet e energjisë elektrike. Një numër i madh spitalesh, të cilët mbështeteshin në furnizimet me energji elektrike nga Turqia ndër vite, tani do të duhet të fillojnë të varen nga gjeneratorët, të cilët kërkojnë naftë, “tha Edo, i cili ka shpërndarë disa ndihma.
Khalil Ashawi, një fotoreporter me qendër në Jidayris në veriperëndim të Sirisë, tha se në 10 vitet e tij të mbulimit të luftës në Siri, nuk ka parë skena aq katastrofike sa ato që pa të hënën.
“Është një fatkeqësi. Mjekët e ndihmës dhe zjarrfikësit po përpiqen të ndihmojnë, por për fat të keq, ka shumë për ta përballuar. Ata nuk mund t’i përballojnë të gjitha. Familje të tëra janë vrarë. Shtatë deri në tetë persona nga e njëjta familje, të gjithë janë zhdukur. Këto janë situatat për të cilat po shoh dhe dëgjoj sot,” tha ai.
“Është ngricë për momentin dhe ka kaq shumë njerëz që flenë në rrugë tani sepse nuk kanë shtëpi ku të shkojnë”, tha ai.