Socialistët do të presin konferencën e Metës të hënën në 08:00 të mëngjesit, për të marrë më tej vendim se si do të veprojnë pas vendimit të papritur marrë dje nga presidenti, për anulimin e zgjedhjeve. Report Tv raporton se të enjten do të ketë seancë plenare dhe deputetëve socialistë u është shpërndarë një njoftim për të qenë të pranishëm në sallë pa asnjë mungesë. Të hënën, nuk do të ketë mbledhje të grupit parlamentar dhe kjo pritet të caktohet gjatë javës.
Lëvizjet e mundshme të mazhorancës janë tre. Pas një mbledhje që kanë bërë juristët e Partisë Socialiste, vendimi i Metës mund të ankimohet në Gjykatën Administrative. Së dyti, shfuqizimi i dekretit nga ana e Metës, mund të anulohet me vendim Kuvendi. Skenari tjetër i mundshëm është që Komisionin Qendror i Zgjedhjeve të marrë në shqyrtim çdekretimin, të konstatojë pavlefshmërinë e tij dhe të vijojë punën për përgatitjet zgjedhore për 30 qershorin.
Të gjithë këto, do të konkludohen në një vendim ditën e hënë pasi presidenti Ilir Meta të dalë në konferencën e së hënës për të paraqitur argumentet e tij përse shkoi drejt anulimit të zgjedhjeve, dhe për të parë nëse do të ketë sërish ndonjë veprim të papritur të tij në konferencën e jashtëzakonshme.
Dje pas vendimit, kryeministri Edi Rama u shpreh i vendosur se zgjedhjet e 30 qershorit do të bëhen. Ndërsa sot, nga Burreli ku vijoi fushatën elektorale, ai tha se me veprimin e djeshëm presidenti Ilir Meta shkroi fatin e tij duke humbur të drejtën për të qëndruar në zyrën e kreut të shtetit.