Presidenti Donald Trump po planifikon t’u heqë statusin e përkohshëm ligjor rreth 240 mijë ukrainasve që u larguan nga vendi i tyre për shkak të konfliktit me Rusinë.
Lajmin e ka bërë të ditur një zyrtar i hershëm i administratës presidenciale dhe tre burime në dijeni të planit, të cilëve u referohet agjencia e “Reuters”.
Sipas burimeve, nëse realizohet, plani në fjalë do të jetë fillimi i dëbimit të ukrainasve nga Shtetet e Bashkuara.
Lëvizja, që pritet të konkretizohet brenda prillit, do të jetë një kthesë tronditëse e politikës së ish-presidentit Joe Biden, që mirëpriti ukrainasit.
Burimet nënvizojnë se plani po studiohej përpara se Trump të përplasej me Zelenskyn javën e kaluar në Shtëpinë e Bardhë.
Ajo është pjesë e një përpjekjeje të gjerë të administratës për t’i hequr statusin ligjor rreth 1.8 milionë emigrantëve të cilët janë lejuar të hyjnë në territorin e Shteteve të Bashkuara në bazë të garancisë humanitare të ofruar nga administrata e mëparshme.
Zëdhënësja për shtyp e Shtëpisë së Bardhë, Karoline Leavit iu përgjigj interesit të “Reuters” përmes rrjetit “X”, ku tha se për momentin nuk është marrë asnjë vendim.