Vetëm dy ditë pas rrëmbimit të Nicolas Maduros dhe dërgimit të tij në SHBA, Presidenti Donald Trump ka hapur një tjetër front: Groenlandën. Në një intervistë të fundit, ai u shpreh se SHBA-të ka nevojë urgjente për këtë territor, pasi “është i rrethuar nga anije ruse dhe kineze”.
Trump e ka bërë të qartë se ambicia e tij nuk kufizohet vetëm te nafta e Venezuelës. Ai kërkon Groenlandën për arsye sigurie kombëtare, duke e parë si pikë strategjike kundër Rusisë dhe Kinës.
Nga ana tjetër, Sekretari i Shtetit, Marco Rubio ka lëshuar paralajmërime të forta edhe për Kubën.
“Po të isha në vendin e qeveritarëve të tyre, nuk do të flija i qetë. Do të na duhet të merremi edhe me atë vend“, tha ai.
Ndërkohë që Maduro pret gjyqin në Nju Jork, njeriu kryesor i operacionit në Venezuelë është pikërisht Rubio.
Ai po cilësohet nga mediat si mëkëmbësi i Amerikës në Venezuelë. Rubio, i cili flet spanjisht, po negocion drejtpërdrejt me zëvendësen e Maduros, Delcy Rodriguez.
Plani i Rubios është të “drejtojë nga distanca” Venezuelën, duke u dhënë urdhra zyrtarëve vendas. Mesazhi është i qartë: Kush bashkëpunon, shpëton. Kush nuk dëgjon, do të përballet me një sulm të dytë amerikan, edhe më të rëndë se i pari.
Trump dhe Rubio i kanë vendosur disa “detyra shtëpie” qeverisë së përkohshme në Venezuelë:
Ndalimin e trafikut të drogës dhe bandave kriminale.
Rinisjen e nxjerrjes së naftës nga kompanitë amerikane.
Prerjen e marrëdhënieve me Iranin dhe grupet si Hezbollahu.
Dëbimin e rebelëve kolumbianë (FARC dhe ELN).