Fiks Fare denoncoi mbrëmjen e së hënës dhunën “kafshërore” ndaj një vajze vetëm 13-vjeçare në Sarandë.
Emisioni investigativ faktoi me zë dhe figurë se nëna e dhunonte sistematikisht vajzën për arsye të ndryshme. Dhuna ishte jo vetëm psikologjike, por edhe fizike. Madje ishte njerku i saj, i cili iu drejtua me një denoncim emisionit investigativ.
Në një prononcim për Tirananews.al, kryetarja e Agjencisë Shtetërore për të Drejtat dhe Mbrojtjen e Fëmijës , Alma Tandili, shpjegon se vajza është marrë në mbrojtje të menjëhershme nga shteti dhe se për momentin ajo ndodhet në komisariat ku edhe po jep shpjegime për ngjarjen.
Ajo shpjegon se në raste të tilla sipas ligjit, fëmijët merren në mbrojtje duke i larguar nga dhunuesi, në raste të tilla fëmija vendoset nën përkujdesje alternative, çka nënkupton pranë ndonjë të afërmi, institucioni të kujdesit rezidencial ose në familje kujdestare. Megjithatë ky është një vendim që në fund e merret gjykata edhe pas rekomandimit të përfaqësuesit të mbrojtjes së fëmijëve.
Tandili sqaron se, vajza është ende duke u pyetur në polici nën prezencën e dy psikologëve dhe përfaqësuesit të mbrojtjes së fëmijëve të Bashkisë Sarandë.
Por 13 -vjeçarja deri tani ka shprehur se do që të qëndroje në praninë e tezes dhe dajës, në shtëpinë e tyre.
Kryatarja e Agjencisë Shtetërore për të Drejtat dhe Mbrojtjen e Fëmijës shpjegon, se tezja dhe daja kanë shprehur pëlqimin për ta marrë në shtëpi, dhe duke parë edhe dëshirën e vajzës që nuk do të shkojë në institucion.
Megjithatë sipas Tandilit, do të bëhet edhe një vlerësim i familjes së dajës, për të parë nëse janë kushtet që fëmija të jetë i sigurt. Tandili thotë se vajza është më mirë dhe se i janë ofruar të gjitha shërbimet e nevojshme./ Tirananews.al/