Vetëvrasja mbetet pista kryesore e hetimeve për ngjarjen në Balldre të Lezhës. 25-vjeçari Romario Brunga u gjet i pajetë në makinë. Kamerat e sigurisë kanë konfirmuar se i riu ka dalë nga puna i pa shqetësuar, ka hipur në makinë vetëm dhe deri në hyrjen e tij tek rruga që e dërgon në shtëpi është parë krejt i vetëm dhe shihet që vazhdimisht flet në telefon.
Ai ka telefonuar një shokun e tij që i ka thënë se ka një hall të madh, por pa i shpjeguar detaje. Pas këtij momenti, Brunga nuk i është pergjigjur më telefonatës së shokut të tij. Policia ka sekuestruar telefonin për të hapur tabulatet apo për të parë nese ka mesazhe që identifikojnë shkaqet që mund të kenë çuar drejt vetëvrasjes 25 vjeçarin Romario Brunga.
Referuar ekspertizës mjeko-ligjore në trupin e viktimës bëhet me dije se ai ka një plumb në kokë. Arma me të cilën është qëlluar u gjet brenda automjetit të tij, e mbushur. Ekspertiza paraprake tregon se automjeti nuk ka shenja të dëmtimeve të jashtme. Arma pistoletë dhe gëzhoja e gjetur në vendin e ngjarjes, janë dërguar për ekspertim balistik. Romario Brunga ishte martuar në gusht të vitit të kaluar.