Më 14 maj 2023, do të mbahen zgjedhjet lokale. Opozita është ende në ujëra jo të qetë, ku kushtet nga aleatët ndaj kreut të PD-së, po tregohen sheshit. Pas Ilir Metës që kërkon kreun e Këshillit Bashkiak të Tiranës, kreu i Partisë Bashkimi për të Drejtat e Njeriut, Vangjel Dule ka treguar se i ka kërkuar Sali Berishës tre bashki.
“Të tjerët duhet që të na japin zona të lira, pra që të mos kandidojnë në zonat ku jemi forcë e parë, apo e dytë politike. E kam fjalën për Bashkinë e Himarës, Dropullit dhe Finiqit. Me përjashtim të këtyre bashkive, kemi një rol edhe në bashkitë e tjera. PBDNJ në të paktën këto 3 bashki do të ketë kandidaturat e veta fituese e ndaj duhet që Koalicioni opozitar të votojë vetëm emrat e PBDNJ. Kjo është një nga çështjet që nuk diskutohet për kryetar Bashkie. Pastaj kemi një rol në disa bashki si Sarandë, Konispol, Gjirokastër dhe Korçë. Kemi një përqindje të caktuar, pothuaj përcaktuese”.
Pra PBDNJ-ja i vendos kushte Berishës, dhe nëse nuk ia plotëson opozita atëhere Dule kalon me kryeministrin Edi Rama. Nuk do të jetë hera e parë që mes Dules dhe Ramës të ketë marrëveshje.