Analisti Lorenc Vangjeli, i ftuar në emisionin “Now me Erla Mëhillin”, ka folur për kërkesat e Partisë së Lirisë (PL) ndaj Partisë Demokratike (PD) për zgjedhjet e 11 majit.
Sipas tij, PL ka kërkuar 8 vende të sigurta në listë, por për PD-në ky numër është i lartë dhe i papranueshëm.
“Berisha është nën proces gjyqësor, ndërsa Meta i paraburgosur. Kjo është aleanca e opozitës. PL kërkon 8 vende të sigurta, por PD e ka konsideruar këtë kërkesë të tepërt. Gjithsesi, dinamikat mund të ndryshojnë,” tha Vangjeli.
Duke folur për listat e kandidatëve, ai tha se Berisha po hyn në këto zgjedhje me të njetët emra që dikur betoheshin për Lulzim Bashën.
“Shumica e tyre ishin njerëz që dikur betoheshin se Lulzim Basha do të bëhej kryeministër dhe tani e cilësojnë atë si tradhtar,” theksoi ai.
Sipas Vangjelit nuk kuptohet nëse qeverisë i intereson që Ilir Meta të mbetet në paraburgim ose jo, duke e krahasuar këtë situatë me atë të Fatos Nanos në 1996.
“Meta do të bënte fushatë nga izolimi, një skenar që kemi parë më parë me Nanon,” tha ai.