Erion Veliaj firmosi nga qelia, delegimin e detyrës së kryebashkiakut për një tjetër nga nënkryetarët e bashkisë, Sara Goxhajn.
Në media u përfol se kreu i qeverisë kërkoi rikthimin në detyrë të të komanduarës Anuela Ristani, situatë për të cilën Erion Veliaj zgjodhi të reagojë publikisht nga qelia e paraburgimit të Durrësit.
Kryebashkiaku thotë se firmosja e ridelegimit u bë duke menduar se emri i Sara Goxhajt ishte dakordëduar brenda grupit drejtues.
Duke qenë se ai ndodhet në kushtet e izolimit dhe nuk ka pasur informacion më të detajuar, dhe njofton se me një vendim të dytë të tij, detyra i është deleguar sërish Anuela Ristanit.
Postimi i plotë
U informova që paska plasur peshku në moçalet mediatike për përplasjen time me Ramën, për punë delegimesh. E para njëherë, me Ramën kam vetëm mall të takohem për të folur për punët si gjithmonë dhe asgjë tjetër s’më shkon në mendje.
E dyta, kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur “punon” pa informacionin e mjaftueshëm.
E fundit, kërkoni e gërmoni ku të doni tani, se u bë sport ky falë edhe prokurorit tim të dashur, por në marrëdhënien time me Ramën lodheni kot fare fare, se është plazmuar në kohëra të vjetra dhe nuk e ndryshon dot asnjë kohë, sado e mallkuar qoftë. Delegimi është rikthyer aty ku ishte dhe këtu mbyllet edhe keqkuptimi.