Vetëm pak ditë pasi policia e Shtetit bëri të ditur shtimin e kontrolleve dhe ashpërsimin e masave për parandalimin e COVID, kreu i policisë Ardi Veliu përmes një urdhri u ka dhënë detyrat komisariateve lidhur me situatën alarmante pas shtimit të rasteve me rekord ditë pas dite.
Mësohet se kryepolici i vendit i ka kërkuar çdo komsiariati nga një listë për zonat e tyre të personave që janë pozitive me COVID dhe efektivët duhet të kontrollojnë nëse zbatojnë vetëizolimin apo jo. Ndërkaq, gjithashtu, referuar dhe asaj që kryeministri Edi Rama tha një ditë më parë, Veliu ka dhënë urdhër që të ndalohen kategorikisht tubimet.
Një tjetër pjesë e urdhrit është dhe pajisja me maska e policëve dhe kontrolli në qendra tregtare dhe supermarkete që klientët ti përdorin ato.
Policia do i vijë në ndihmë dhe grupeve të inspektimit të ISHSH për kontrollet në terren krahas kontrolleve të saj nëse po zbatohen apo jo masat ndaj koronavirusit.