Flamurtari është padyshim surpriza e madhe e këtij sezoni në Kategorinë Superiore, duke qenë se pavarësisht krizës ekonomike që ka kapluar klubin vlonjat, fitorja ndaj Teutës e ngjiti në vendin e tretë. Futbollistët po tregojnë një karakter të jashtëzakonshëm pasi megjithëse nuk paguhen prej muajsh, po bëjnë paraqitje dinjitoze me fanellën kuqezi.
Pak ditë më parë, në një prononcim pas ndeshjes ndaj Tiranës, trajneri Ilir Daja tha se do të ishte i kënaqur sikur skuadra të kishte të njëjtët futbollistë si para janarit duke iu referuar këtu largimeve të shumta në merkaton e dimrit. Ai pranoi se nëse nuk do të ishin larguar aq futbollistë, atëherë Flamurtari do të ishte në pozita më të mira.
Mesa duket, dëshira e Dajës po realizohet duke qenë se shumë shpejt pritet që me skuadrën të afrohet një nga yjet e para-janarit. Agustin Torasa ka arritur marrëveshjen me administratorin Sinan Idrizi dhe pritet që ditët në vazhdim të rikthehet në Shqipëri. Ai u largua në janar për të firmosur në kampionatin kinez me Janbian Funden, por klubi falimentoi dhe prej asaj kohe, Torasa po shijon pushimet në Argjentinë.