Në 6 Mars qytetarët e 6 bashkive të vendit, përfshirë edhe Shkodrën do të shkojnë drejt kutive të votimit.
Deputeti i PD, Edmond Spaho, u shpreh se tashmë problemi i Komisionit të Rithemelimit është përzgjedhja e kandidatëve sa më të mirë.
Spaho thotë se bazuar në statutin e 11 dhjetorit fillimisht do të zhvillohen primaret, ndërsa shton se çdo person është i lirë të kandidojë.
Edmond Spaho: Problemi i parë është përzgjedhja e kandidatëve që të jenë figura sa më të mira dhe përfaqësuese. Mbi bazën e përcaktimeve në statutin që miratuam në 11 dhjetor do të zhvillohen primaret. Ne nuk pengojmë askënd. Kushdo që të vij të kandidojë nga brenda apo jashtë partisë qofshin dhe nga ata që mbështesin Bashën, të vijnë në primaret, dhe të votojnë kandidatin që mendojnë të jetë përfaqësuesi i tyre.
Ai tha se ende nuk kanë marrë asnjë vendim se si do të regjistrohen në zgjedhje, ndërsa shton se ka bisedime se mund të dilet edhe me koalicion.
Edmond Spaho: Ende nuk kemi marrë ende një vendim se si do të regjistrohemi. Ka disa opsione, mund të dilet me koalicion, po zhvillohen bisedime. Basha është pjesë e qeverisë për këtë përditë po dalin fakte, të lidhura me interesa politike. Agron Kapllanaj është njeri i Bashës. Ne kemi kërkuar të vendosë vota. Në të gjithë shoqëritë demokratike, vota ndan shapin nga sheqeri. I kemi bërë thirrje të vij dhe të votohet. Basha i trembet garës. E di se demokratët nuk e duan. Për rrjedhojë në këtë situatë ku kemi arritur nuk kemi arritur për fajin tonë. Protestat do të jenë pjesë e strategjisë që do lëvizim. Po konsultohemi me mbështetësitë tanë se kur duhet organizuar një protestë tjetër.
Spaho e mbylli fjalën duke thënë se ata nuk kanë hequr dorë nga selia e PD.