Aksidenti në Lushnjë, ku humbi jetën një 29-vjeçar, është një ngjarje e trishtë. Nga vendi ku u përgjak, ka folur deputeti socialist Erion Braçe. Ai thotë se në këtë segment rrugor, nga Krujtja në Zhymë ndodhin shpesh aksidente me vdekje, dhe për këtë fakt ”ka dy vite që flas dhe lutem”, thotë ai, por nuk është marrë asnjë masë.
”Kjo është dita dhe rasti kur të qenit deputet është plotësisht kot, tërësisht i padobishëm. Është një copë rrugë nga Krutja në Zhymë dhe në “Pushimin e Shoferit”. Ka vdekur një djalë i ri përsëri! Në të njëjtin vend, në të njëjtën kthesë që vret njerëz. Në të njëjtin vend për të cilin kam dy vite që flas, bërtas, lutem e lus drejtorë, menaxherë, kompani, administratorë, kontraktorë, të gjithë me radhë i lut deputeti; Dy vite kanë bërë asgjë, zero! Deputeti që vë fytyrën e tij atje thjesht numëron të vdekurit dhe i vjen turp edhe të ngushëllojë! Nuk di, por nëse të gjithë këta bëjnë asgjë, për çfarë duhen, për çfarë”, shkruan deputeti socialist.
Shtimi i lëvizjeve si pasojë e turizmit ka rritur ndjeshëm fenomenin në Shqipëri. Të dhënat nga Instituti i Statistikave tregojnë se në 6 muajt e parë të vitit u regjistruan 767 aksidente, me mbizotërim në muajin qershor. Në muajin me më shumë aksidente ishte grupmosha deri në 24 vjeç shkaktarja kryesore, në gjysmën e parë të vitit grupmosha e të rinjve 25-34 vjeç që “përgjakën” rrugët e Shqipërisë. Moszbatimi i sistemit bonus malus i cili dënon shoferët përsëritës sipas ekspertëve ka ndikuar në këtë shtim të aksidenteve.