Presidenti i UEFA-s, Aleksander Ceferin, si pjesë të vizitës së tij në Shqipëri ka pasur edhe një mbikëqyrje të punimeve të “Shtëpisë së Futbollit”, zyrave të reja të FSHF-së që vendosën mbi themelet e atij që ishte dikur kompleksi Dinamo.
Ceferin, i shoqëruar bashkë me zyrtarë të tjerë të UEFA-s, si dhe delegacionin e Federatës Franceze ka parë nga afër ambientet e tjera të FSHF-së, duke dëgjuar shpjegimet për çdo hapësirë të tij, se si do të ndërtoheshin përkrah tij edhe ministadiumet me dy fusha. “Ishte kompleksi i një klubi që ka rënë nga kategoria dhe e morëm ne”, shpjegoi presidenti i FSHF-së, Duka, para ndërkombëtarëve.
Numri 1 i futbollit eruopian dukej mjaft i interesuar për këtë projekt duke u ngjitur deri në katet më të larta, ndërsa nuk evitoi batutat gjatë gjithë kësaj vizite. Duke dalë nga ndërtesa ai i tha duke qeshur bashkëpunëtorëve të tij. “Ka bërë zyrën e vet më të madhe se e gjithë ekspozita. Duhet ta bëj edhe unë këtë”, tha presidenti i UEFA-s në fund të vizitës.