Kryeministri Edi Rama ka reaguar pas jehonës ndërkombëtare që mori ironia e tij gjatë takimit në Kopenhagë me presidentin e Azerbajxhanit, Ilham Aliyev, dhe presidentin francez, Emmanuel Macron, ku ai ironizoi një nga lapsuset e presidentit amerikan Donald Trump, i cili kishte ngatërruar Shqipërinë me Armeninë.
Sipas kryeministrit Edi Rama, ajo që ai tha për Trump në prani të Macron “nuk ishte gjë tjetër veçse një moment humori i mirë midis njerëzve që, në fakt, janë ndër admiruesit më të mëdhenj të Presidentit Trump”.
Rama më tej vlerëson rolin e Presidentit Trump, duke theksuar se është një lider që i riktheu fjalës “paqe” rëndësinë në fjalorin e Perëndimit.
“Në një kohë jashtëzakonisht të shkurtër, ai ka arritur paqe aty ku të tjerët dështuan dhe vazhdon ta ndjekë atë pa reshtur.”
“Ishte një moment humori i mirë mes miqsh. Sigurisht, nuk ka asnjë problem që të shpërndahet, por të shndërrohet në helm politik është thjesht e padrejtë,” shton Rama.
Postimi i plotë:
Është me të vërtetë e jashtëzakonshme se si funksionojnë mediat sot, dhe si ajo që quhet “viralitete” mund të shtrembërojë kaq lehtë realitetin. Një fjali e thënë me humor të mirë, në frymën e miqësisë, papritur kthehet në titullin kryesor global të një samiti të tërë mes dhjetëra vendeve, ndërsa e gjithë pjesa tjetër, substanca reale, bëhet e parëndësishme.
Por po, ishte një kënaqësi sot të jem me mikun tim të vjetër Ilham Aliyev dhe, në prani të mikut tonë të përbashkët Emmanuel Macron, të përmend një lapsus të Presidentit Trump që edhe Shqipëria kishte arritur të bënte paqe me Azerbajxhanin, ndërkohë që vetë Emmanuel punoi pa lodhje, për një kohë të gjatë, për të sjellë paqen midis Azerbajxhanit dhe Armenisë.
Një shaka e lehtë, një moment miqësie. Sigurisht, nuk ka asnjë problem nëse kjo përhapet, por ta kthesh atë në helm politik është thjesht e padrejtë. Prandaj le të vendosim gjërat në vendin e duhur:
E vërteta është se Presidenti Trump është treguar një lider që i riktheu fjalës “paqë” vendin në fjalorin e Perëndimit pas shumë vitesh. Dhe po, në një kohë jashtëzakonisht të shkurtër, ai ka arritur paqe aty ku të tjerët u përpoqën, por dështuan, dhe vazhdon ta ndjekë atë pa pushim.
Ky shkëmbim fjalësh nuk ishte gjë tjetër veçse një moment humori mes njerëzve që janë, në fakt, ndër admiruesit më të mëdhenj të Presidentit Trump.
