Izraeli ka akuzuar Hamasin për vrasjen e vëllezërve Ariel dhe Kfir Bibas, pasi ushtria izraelite kreu një ekspertizë mjekoligjore pas dorëzimit të trupave, ndërsa eshtrat e nënës së tyre janë ende të pagjetura.
“Ariel dhe Kfir Bibas u vranë me gjakftohtësi nga terroristët. Ata nuk i qëlluan dy vogëlushët, i vranë me duart e tyre dhe kryen akte të tmerrshme për të mbuluar këto mizori”, tha në një deklaratë sot zëdhënësi i Forcave të Mbrojtjes izraelite, Daniel Hagari.
Dy vëllezërit u rrëmbyen nga Hamasi së bashku me nënën e tyre, Siri dhe babanë, Yarden gjatë sulmit të 7 tetorit në vitin 2023. Dy djemtë në atë kohë ishin 4 vjeç dhe 9 muajsh.
Babai i tyre u lirua në fillim të këtij muaji si pjesë e marrëveshjes së armëpushimit mes Hamasit dhe Izraelit.
Organizata palestineze dorëzoi dje katër trupa, dy prej të cilëve u identifikuan si foshnja Kfir dhe vëllai i tij Ariel, ndërsa trupi i tretë, që supozohet të jetë nëna e tyre, Siri, nuk është konfirmuar të jetë trupi i vërtetë i saj.
Benjamin Netanyahu u zotua të sigurojë që Hamasi “të paguajë çmimin e plotë” pasi grupi dështoi të kthejë trupin e Sirit, në atë që kryeministri e quajti një shkelje “mizore” të armëpushimit.
Hamasi dha një shpjegim të frikshëm se pse grupi dorëzoi trupin e një individi të panjohur në vend të pengut izraelit. Ata pretenduan se eshtrat e Sirit ishin përzier me ato të një gruaje tjetër që u varros pranë saj në rrënoja pas një sulmi ajror izraelit që goditi vendin ku ajo po mbahej.
Ndërkohë, familja Bibas akuzoi sot Netanyahun se nuk i ka mbrojtur të dashurit e tyre gjatë sulmit të Hamasit në vitin 2023 dhe se nuk i ka sjellë ata në shtëpi.
Tezja e fëmijëve, Ofri Bibas, në një deklaratë emëroi kryeministrin izraelit si përgjegjës: “Nuk ka falje për braktisjen që iu bë atyre më 7 tetor dhe gjatë kohës në robëri. Kryeministër, nuk kemi marrë asnjë falje nga ju në këtë moment kaq të dhimbshëm për ne“.