Presidentja e Komisionit Evropian, Ursula von der Leyen ka sugjeruar që vendet që janë të gatshme të punojnë për çështje ekonomike të vazhdojnë në grupe më të vogla nëse nuk arrihet unanimiteti para një samiti kyç, i fokusuar në forcimin e ekonomisë evropiane, e cila është nën presionin e SHBA-së dhe Kinës, sipas Euronews.
Kjo ide nënvizon një qasje më fleksibile në politikën e integrimit evropian, duke hapur rrugën për një Evropë me dy shpejtësi, ku disa shtete mund të avancojnë më shpejt se të tjerat në fushat kyçe ekonomike dhe infrastrukturore.
Von Der Leyen tha se qëllimi mbetet të bëhet përpara me një agjendë ekonomike ambicioze të rënë dakord nga të 27 shtetet vendet anëtare, por nëse kjo nuk është e mundur për shkak të diferencave politike, shtetet anëtare duhet të kthehen te koalicione më të vogla.
Sipas saj, politika e unitetit nuk duhet të bëhet pengesë për veprim efektiv, sidomos në një kohë kur Evropa përballet me sfida të mëdha ekonomike dhe gjeopolitike.
Komentet e saj vijnë pas thirrjes së Mario Draghit, ish-kryeministrit italian dhe një nga zërat më influentë në debatin evropian, i cili ka kërkuar që BE-ja të funksionojë si një union i vërtetë dhe ka inkurajuar liderët evropianë të ndjekin një qasje federaliste pragmatike për projekte të përbashkëta, nga energjia tek siguria, duke theksuar nevojën për koordinim dhe solidaritet në periudha krize.
“Ambicia jonë duhet të jetë gjithmonë që të arrihet marrëveshja midis të 27 shteteve anëtare”, shkroi Von der Leyen në një letër drejtuar sot liderëve evropianë.
“Sidoqoftë, kur mungesa e përparimit ose ambicies rrezikon të dëmtojë konkurrueshmërinë apo aftësinë e Europës për të vepruar, nuk duhet të hezitojmë të përdorim mundësitë e parashikuara në traktatet nën bashkëpunimin e avancuar”, theksoi ajo.
Parimi i bashkëpunimit të avancuar lejon shtetet anëtare, për sa kohë që një minimum prej nëntë vendeve bien dakord, të thellojnë integrimin pa pjesën tjetër të shteteve anëtare.
Komentet e Von der Leyen shënojnë një ndryshim të rëndësishëm nga parimi i konsensusit që udhëheq institucionet e BE-së dhe hapin rrugën për një Evropë me dy shpejtësi.
Liderët evropianë do të mblidhen për një tërheqje informale të enjten në kështjellën ”Alden Biesen”.
Draghi do t’i bashkohet të 27 vendeve së bashku me ish-kryeministrin italian, Enrico Letta.
Para samitit, një grup prej 10 vendeve do të takohen me ftesë të Gjermanisë, Italisë dhe Belgjikës për të vendosur një linjë të përbashkët.
Franca gjithashtu do të marrë pjesë, sipas një diplomati.
Në letrën e saj, Von der Leyen tha se Komisioni synon të përshpejtojë agjendën e thjeshtimit, por inkurajoi bashkëligjvënësit në Parlamentin Evropian të jenë konstruktivë.