Për shkak të motit të keq, tragetet e nisura nga portet italiane kanë mbërritur me vonesa në Durrës dhe në Vlorë. Autoritet portuale njoftojnë se dy tragete janë nisur me vonesë nga porti i Barit, në fqinjin e përtej Adriatikut. Pritej që këto mjete detare të mbërrinin rreth orës 8 të mëngjesit të kësaj të premteje, por për shkak të motit të keq, janë vonuar.
Një tjetër traget, ai i nisur nga Ankona në Itali, ka mbërritur gjithashtu me një orë vonesë në terminalin e Durrësit paraditen e sotme. Edhe pse moti duket se nuk i favorizon lundrimet, deri përpara mesnatës priten të mbërrijnë edhe dy tragete të tjera nga Bari.
E njëjta situatë raportohet edhe nga Porti i Vlorës, ku trageti i nisur nga Brindisi nuk ka mbërritur ende, edhe pse duhej të kishte ardhur rreth orës 7:30 të mëngjesit.
Trageti i linjës Brindisi-Vlorë, i nisur me vonesë për shkak të motit të përkeqësuar dhe detit të dallgëzuar, pritet të mbërrijë në portin jugor rreth orës 14.