Voskopoja, ndodhet në krahun perëndimor të qytetit të Korçës, e pozicionuar bukur mes kodrave, pyjeve me gjelbërim të përhershëm, është vendi ideal për t’u vizituar, në të gjitha stinët e vitit.
Gjen aty një pistë skish për dimër, ajër të pastër, mikpritje dhe ushqim të shkëlqyer. Është vendi ideal për zhvillimin e turizmit malor dhe llojeve të tjera të sporteve verore dhe dimërore.
Edhe në këto ditë vere Voskopoja vazhdon të jetë destinacioni i preferuar i vizitorëve të cilët eksplorojnë bukuritë natyrore të ndërthurura me objektet e kultit duke lënë pas vapen e padurueshme të qytetit.
Voskopoja ose ndryshe djep i kulturës bizantine ndër shekuj, plot histori e trashëgimi monumentale, kulturë, art, ashtu siç tregohet nga historia ka qenë një qytet i banuar që nga vitit 1330 që arriti kulmin e lulëzimit në 1764, kur kishte më shumë se 30.000 banorë, 24 kisha, akademi, bibliotekë dhe shtypshkronjë.
Sot ruan ende vlera të mëdha të artit mesjetar dhe copëza të shkëlqimit të dikurshëm. 8 nga 27 kishat mesjetare të Voskpojes kanë mbetur ende në fshat: Manastiri i Shën Prodhromit, Kisha e Shën Kollit, Kisha e Shën Thanasit apo Kisha e Shën Ilias, ku mund të admironi pikturat e mrekullueshme murale të piktorëve të famshëm korçarë si David Selenica apo vëllezërit Zografi.
Pasi të keni vizituar objektet e famshme të artit bizantin që ruajnë ende vlera të rralla e të papërsëritshme, mund të shijoni gastronominë tradicionale të zonës duke pasur në krye të tryezës lakrorin e famshëm.
Në Voskopojë i gjen të gjitha.