Servet Karaj, babai i adoleshentit që vrau 15-vjeçarin Fatjon Bicin në Gramsh, është shprehur i tronditur për ngjarjen. Ai thotë se përjeton trishtimin njëlloj si familja e Fation Bicit dhe kërkon që drejtësia të bëjë detyrën e vet.
“I kërkoi falje jashtë mase. Edhe unë e quaj djalin tim se njëlloj janë. Jam gati që të shkoj që sot te familja e tyre nëse pranojnë”, tha Karaj.
“Mjerë ai që iku se ky do rrijë e do dale, por ai s’del më atje ku iku. Mjerë familja e shkretë dhe ne që na zuri…”, u shpreh Karaj.
Mes të tjerave Servet Karaj shtoi se i biri ishte i rregullt dhe aspak problematik.
“Djali ka qenë shumë i qetë, nuk merrej me gjëra të tilla. Atë ditë nuk ka shkuar në shkollë se kishte probleme shëndetësore. Unë isha vetë në Gramsh e 10 minuta pasi jam kthyer më kanë marrë në telefon. Jam habitur. Sjellja e djalit ka qenë normale, nuk të linte përshtypje. Nuk di si të them, nuk kam parë asgjë vete. Në polici na thirrën për deklaratën. Nuk i kam parë asgjë as në cantë, as në xhep. Djali nuk ka pasur raste të tilla, nuk kam dëgjuar asnjëherë debat. Nuk kishim asnjë informacion se po të kisha sikur 2% të dija nuk do të kishte arritur deri këtu. Shkonte në shkollë zakonisht, ishte nxënës mesatar, i rregullt, të shtuna të diela punonte, nuk ishte problematik”, tha Karaj.