Sunderland realizoi një përmbysje spektakolare në “Stadium of Light”, duke mposhtur Bournemouth-in 3-2 dhe duke ruajtur rekordin e pamposhtur në shtëpi këtë sezon në Premier League. Ndeshja nisi me ritëm të lartë. Talbi rrezikoi për vendasit pas vetëm 60 sekondash, por Bournemouth-i goditi i pari në minutën e 7-të: Semenyo harkoi në zonë, Evanilson goditi shtyllën dhe Amine Adli, i pari te topi, shënoi për 0-1.
Miqtë dyfishuan me një supergol nga Tyler Adams, i cili përfitoi nga një top i lirë në mesfushë dhe lobi portierin Roefs nga distanca. Sunderland-i reagoi pas gjysmës së parë të pjesës së parë. Reinildo Mandava u faullua në zonë nga Alex Scott dhe Enzo Le Fée shënoi me qetësi nga penalltia për të ngushtuar diferencën në 1-2.
Pjesa e dytë startoi në mënyrën më të mirë për vendasit. Në minutën e 46-të, një pasim inteligjent i Granit Xhakës i hapi rrugë Bertrand Traoré-së, i cili barazoi me një goditje të ulët në shtyllën e afërt. Bournemouth-i mendoi se riktheu avantazhin, por goli i Evanilson u anulua për pozicion jashtë loje. Me ndeshjen që luhatej vazhdimisht, Sunderland goditi sërish në minutën e 69-të: nga një goditje këndi e Le Fée, Brian Brobbey kërceu më lart se të gjithë dhe shënoi golin e fitores 3-2.
Në minutat e fundit tensionet u rritën dhe Lewis Cook u ndëshkua me karton të kuq për një bërryl të panevojshëm, duke e çuar Bournemouth-in drejt një humbjeje edhe më të rëndë. Fitorja e çon Sunderland-in sërish në top-4, duke i dhënë fund serisë prej tri ndeshjesh pa fitore, ndërsa Bournemouth-i pëson disfatën e tretë radhazi jashtë fushe.