Ish-kryeministri Zoran Zaev në aktivitetin “Ballkani i Hapur Sportiv” i organizuar nga Shoqata e Gazetarëve Sportivë të rajonit tha se Ballkani i Hapur duhet të jetë një model real për vendet e tjera të rajonit dhe më gjerë.
“Ky aktivitet më nxiti qe të flas për bashkëpunimin rajonal si dhe nismën e Ballkanit të Hapur, e cila duhet të jetë një model real për vendet e tjera të rajonit dhe më gjerë. Kjo nismë promovon dhe afirmon besimin në mënyrën më të mirë të mundshme, si një formë e sinqertë e gjetjes së rrugës më të shkurtër për përparim dhe një të ardhme më të mirë”.
Zaev shtoi se shtetet e Ballkanit Perëndimor mund të kenë dallime në shumë aspekte, por të gjithë duhet të përpiqen drejt një të ardhmeje më të mirë për qytetarët e thjeshtë.
“Një Ballkan i hapur nuk është gjë tjetër, por një mundësi e hapur për bashkëpunim të pandërprerë dypalësh apo shumëpalësh në të gjitha fushat e mundshme, përfshirë edhe atë të sportit. Kështu ndërtohet miqësia. Kështu ecim përpara. Kështu ruhet dhe përmirësohet paqja”.
Në aktivitetin e mbajtur në Strumicë ish-kryeministri Zaev, u nderua një çmim nderi nga gazetarët sportivë të Evropës Juglindore. Si kryeministër Zaev ka marrë disa çmime ndërkombëtare për paqen dhe bashkë me ish-kryeministrin grek Alexis Tsipras u nominua edhe për Çmimin Nobel për Paqen.
Zaev u tha gazetarëve se si kryeministër ka bërë negociata jo të lehta dhe ka marrë vendime të vështira për të ardhmen e rajonit dhe tani po punon për këtë qëllim nëpërmjet Fondacionit të tij që të ushqehet politika paqësore, e bazuar në tejkalimin e barrierave, në tolerancë dhe bashkëpunim.