Në takimin mes liderëve politikë të Maqedonisë së Veriut i thirrur nga Presidenti Stevo Pendarovski është vendosur që zgjedhjet e parakohshme të mbahen më datë 12 Prill. Lajmin e konfirmoi Zoran Zaev në një deklaratë për mediat pas takimit.
“Propozimi jonë ishte që 22 ose 29 dhjetor të shkojmë në zgjedhje me konsensus u vendos që 12 prilli të jetë data kur do të mbahen zgjedhjet”, tha Zaev.
Në përfundim të takimit foli edhe kreu i lëvizjes Besa, Bilall Kasami.
“Ne në vazhdimësi kemi kërkuar zgjedhje të parakohshëm dhe me këtë vendim është moment i rëndësishëm që qytetarët të tregojnë orientimin e mëtejshëm. Në asnjë moment nuk duhet të vihet në pikëpyetje procesi euroatlantik i Republikës së Maqedonisë së Veriut. Ne duhet t’i bëjmë detyrat e shtëpisë, që më pas në Samitin e radhës të marrim edhe datën për negociata”, tha ai.
Në takim morën pjesë kryeministri dhe lideri i LSDM, Zoran Zaev, kreu i VMRO-DPMNE, Hristijan Mickoski, kreu i BDI, Ali Ahmeti, lideri i Aleancës për Shqiptarët Ziadin Sela, kreu i Lëvizjes BESA Bilall Kasami, ai i Alternativës Afrim Gashi dhe lideri i PDSH, Menduh Thaçi./