Kryeministri Edi Rama ka ndarë sot në një postim në Facebook një zbulim arkeologjik në zonën e Bulqizës, konkretisht në fshatin Strikçan. Sipas tij, bëhet fjalë për një gërmim të rrallë që ka sjellë në dritë varrin e parë monumental të periudhës romake të zbuluar ndonjëherë në Shqipëri.
Monumenti, i ndërtuar në formën e një mausoleumi, ka përmasa mbresëlënëse – rreth 9 metra me 6 metra, dhe përfshin një dhomë funerare me lartësi 2.4 metra. Ajo që e bën edhe më të veçantë këtë zbulim është një mbishkrim bilingual romak, i cili i kushtohet personit të varrosur, një individ me emrin Gellianos, si dhe perëndisë Jupiter.
Sipas specialistëve, ky është mbishkrimi i parë i këtij lloji i zbuluar ndonjëherë në zonën e Dibrës, dhe një prej të paktëve të këtij karakteri në gjithë territorin shqiptar. Zbulimi përmban elementë të rrallë arkitektonikë dhe epigrafikë, duke sjellë një pasuri të re në historinë arkeologjike të vendit.
