Partia Demokratike dhe aleatët e saj do të vijojnë tashmë me protesta në mbarë vendin, pas dy protestave të mëdha të zhvilluar në Tiranë, pasoja e të cilave ishte vendimi ekstrem i deputetëve të opozitës për të djegur mandatet e tyre në Parlament.
Opozita tashmë kërkon zgjedhje të parakohshme, ndërkohë që në mbledhjen e Kryesisë së një dite më parë Basha tha se po hartohet kalendari i protestave në të gjithë vendin.
Sipas Bashës, Kolegji i Kryetarëve dhe Këshilli Kombëtar i Partisë Demokratike do të marrin vendimet përkatëse të organizimit, të kalendarit, të datave, të mobilizimit mbarëqytetar për të vazhduar protestat mbarëpopullore për largimin e Maduros së Ballkanit”, deklaroi kreu i PD-së. Partia Demokratike nuk do të veprojë e vetme, por përmes shtabeve politike do të bashkëpunojë në nivel qendror e lokal me partitë e tjera opozitare. PD-ja do të përgatitet për përzgjedhjen e kandidatëve në zgjedhjet vendore, të cilat sipas Bashës mund të jenë në të njëjtën kohë me ato parlamentare.
“Është marrë një vendim i rëndësishëm për ngritjen e shtabeve politike dhe organizative, në nivel qendror dhe lokal, të cilat, në bashkëpunim me partitë e tjera të opozitës së bashkuar, do të bëjnë të mundur përparimin me këtë kalendar pune dhe organizimin e protestave të fuqishme mbarëpopullore në të gjithë territorin e vendit. Janë marrë edhe vendime të tjera që kanë të bëjnë me fuqizimin e organizimit të Partisë Demokratike, në funksion edhe të synimit tonë, zgjedhjeve të parakohshme parlamentare dhe paraqitjes me kandidaturat më të denja të PD-së në këto zgjedhje, natyrisht edhe në zgjedhjet e tjera vendore”, deklaroi kreu i PD-së.