Kreu i KQZ Ilirjan Celibashi, gjatë një intervistë, ka vlerësuar zgjedhjet e 25 prillit brenda ligjit sa i përket përgjegjësisë së këtij institucioni.
“Nuk jam kategorik dhe do isha një lojë “Donkishoti” nëse do them se Shqipëria është duke zhvilluar apo po realizon një proçes zgjedhor të standardit të Danimarkës apo Suedisë. Ligjimiteti këtij proçesi nuk i ka munguar. Problematikat do verifikohen se cilat kanë qenë ato, sa qëndrojnë në themel të këtij proçesi dhe në fund do themi se a ky proçes reflektoi vullnetin e lirë të qytetarëve dhe a ishte gara e ndershme apo jo. Me siguri them që është një proçes që është zhvilluar në shinat e ligjit. Të paktën sa i përket përgjegjësisë së KQZ ndaj partive politike”, u shpreh Celibashi.
Më tej Celibashi tha se i bashkohet shqetësimit të opozitës në lidhje me shit-blerjen e votave dhe kërkoi hetim dhe ndëshkim për secilin që ka kryer një krim të tillë.
“Si pretendim është patjetër pjesë e shqetësimit tonë, nuk mund ta injorojmë. Shitja dhe blerja e votës është vepër penale dhe vlerësimi mbi të është prokuroria. Ne si KQZ mbështesim çdo vendim që heton këto raste dhe personi të marrë përgjegjësitë penale. Çdo kush duhet ta nxisi hetimin dhe verifikimin e këtyre rasteve”, tha Celibashi.