Edon Zhegrova u bë një nga lëvizjet më të bujshme, pasi arriti të kalonte te Juventusi. Ky transferim u bë i mundur edhe falë dhënies në kohë të pasaportës shqiptare nga kryeministri Edi Rama drejt yllit të Kosovës. Mamaja e Edonit, Sanije Zhegrova, tregon prapaskenat e këtij transferimi dhe bisedat e sulmuesit shqiptar me kryeministrin Rama.
“Ka qenë pak stresuese si verë. Ka pasur shumë klube që ishin të interesuara para Juventusit. Ishin Dortmund, Marseille, por vula ishte Juventusi dhe ne të gjithë ishim të lumtur, si Edoni, si ne si familje.
Për tre javë mbyllej merkatoja. Edoni meritonte letrat belge, por për shkak të lëvizjes së futbollit, Edoni nuk e mori dot pasaportën belge. Juventusi na komunikoi që nëse do të merrte pasaportën shqiptare, do të ishte më e lehtë. Edoni i ka dërguar një mesazh kryeministrit Edi Rama, për të cilin unë i jam gjithmonë falënderuese kryeministrit.
Ai i nisi një mesazh dhe Rama iu përgjigj: ”Respekt. E kryer është”. Me sa jam në dijeni, në debutimin e Edonit, në stadium ka qenë vëllai i kryeministrit dhe Edoni ia dha fanellën. I jam mirënjohëse pafund kryeministrit dhe shtetit shqiptar për përkrahjen.
Pasi e mori pasaportën, Edoni ka komunikuar me kryeministrin Edi Rama dhe i tha: ‘Nuk di si ta falënderoj’, dhe Rama tha: ‘Asgjë s’dua, vetëm një fanellë të Juventusit”’.