Nga sa bën me dije agjencia e Gardës Kufitare polake, afro 1.33 milionë njerëz janë larguar nga Ukraina në Poloni që pas nisjes së pushtimit të vendit nga Rusia.
Nëpërmjet një postimi në “Twitter” ditën e sotme, agjencia shprehet se njerëzit që kanë hyrë në Poloni, 93% janë shtetas ukrainas, 1% janë polakë dhe 6% janë qytetarë të pothuajse 100 kombeve të tjera.
Agjencia thotë se vetëm të martën, 125,800 njerëz kaluan kufirin, nga rekordi ditor i së dielës prej 142,300. Deri në orën 06:00 (lokale) të mërkurën, 33,500 njerëz kaluan kufirin.
Polonia është shndëruar në shtëpinë e re të shumë ukrainasve. Vlerësimet variojnë nga një deri në dy milion njerëz, dhe shumë kanë shkuar për të qëndruar me familjen ose miqtë atje. Mijëra polakë po presin refugjatë edhe në shtëpitë e tyre.