Si sot një vit më parë ndërroi jetë politikani Bashkim Fino. Këtë vjetor të ndarjes së tij nga jeta e ka përkujtuar Kryeministri Edi Rama. Në një postim në rrjetet sociale ai ka shpërndarë dy foto nga ceremonia mortore e Finos.
“Sot 1 vit më parë në lamtumirën e mikut tonë të mirë, Bashkim Fino! I paharruar gjithmonë”, shkruan Rama në Facebook.
Bashkim Fino ndërroi jetë në moshën 59-vjeçare për shkak të komplikacioneve nga koronavirusi. Në nder të tij, qeveria e shpalli 29 Marsin ditë zie, ku flamujt në të gjitha institucionet u ulën në gjysmështizë.
Fino lindi më 12 Tetor të 1962 në Gjirokastër. Ai ishte kryeministër i Shqipërisë prej 9 Marsit 1997 deri më 29 Qershor 1997. Studimet e larta, Fino i kreu në Universitetin e Tiranës për Financë. Në vitin 1992, Bashkim Fino u zgjodh Kryetar i Bashkisë Gjirokastër, post të cilin e mbajti deri në vitin 1996.
Prej vitit 1997 e në vazhdim Fino ka qenë anëtar i Kryesisë së Partisë Socialiste. Ai ka mbajtur disa poste ministrore. Nga viti 1997 deri në 1998 ushtroi detyrën e Ministrit të Pushtetit Lokal, njëkohësisht dhe Zv/kryeministër. Në 1999 deri në vitin 2001 do të ishte ministër i pushtetit lokal. Gjatë viteve 2001-2002 ka qenë Ministër i Punëve Publike dhe Turizmit.