Lëvizja Socialiste për Integrim feston sot15-vjetorin e krijimit. Në Pallatin e Kongreseve drejtuesit dhe anëtarët e LSI-së, forcës së dytë më të madhe në opozitë kanë festuar ditëlindjen e kësaj force politike. Kryetarja e LSI-së, Monika Kryemadhi u shpreh se misioni i LSI-së është integrimi i Shqipërisë në BE dhe për këtë nuk do të ndalet.
“Sfidat kanë qenë të shumta dhe të jashtëzakonshme. Mbështetja për forcën tonë nuk ka shteruar asnjëherë. Ne u rezistuam goditjeve që synonin eliminimin tonë, nga sistemi zgjedhor te makinacionet. Fituam sepse jemi bashkë dhe kemi dashurinë për vendin. Nuk ka forcë që na ndal në misionin tonë, integrimin europian. Sot bota politike dhe intelektuale diskuton një dramë që ka mpirë shoqërinë tonë duke larguar rininë, e kam fjalën për polarizimin dhe pabarazinë.Nuk është rastësi që vendi ka mbetur pa gjykata, ligji për kadastrat, ligji për kthimin e dividentit apo vjedhjen e truallit të teatrit. Kemi edhe ne përgjegjësinë tonë, pavarësisht se disa inciativa kanë qenë të mira, por nuk kemi mundur të imponohemi. Unë jam një socialiste demokrate me formimin tim. E majta e vërtetë duhet të vendoset në shina. LSI duhet të çlirojë të majtën nga thundra e Rilindjes“, tha Kryemadhi.