Që nga janari i 2017-tës Ambasada amerikane u ka mohuar apo revokuar vizat rreth 170 ish zyrtarëve dhe familjarëve të tyre.
Në një deklaratë ekskluzive për gazetën “Panorama” ambasada sqaron se vazhdon të ushtrojë autoritetin e vet të gjerë për të mohuar dhe revokuar viza bazuar në informacione që tregojnë se një individ mund të jetë i papranueshëm në Shtetet e Bashkuara, dhe do të vazhdojë ta përdorë këtë autoritet për të çuar përpara përpjekjet antikorrupsion në Shqipëri”.
E pyetur nga “Panorama” nëse ka ndryshime në regjimin e vizave për zyrtarët apo ish zyrtarët e lartë, ambasada thotë se ka kontrolle shtesë në rastet kur ka pretendime për korrupsion të tyre.
Ambasada thotë se i merr shumë seriozisht pretendimet për korrupsion dhe do të vazhdojë të shqyrtojë vizat dhe aplikimet për vizë të zyrtarëve publikë me kontroll shtesë.
Në përgjigjen e saj gjithashtu sqarohet se “Pozicioni i Ambasadës së SHBA kundër korrupsionit dhe synimi i saj për t’iu mohuar hyrjen në Shtetet e Bashkuara zyrtarëve dhe ish-zyrtarëve të korruptuar mbetet i pandryshuar”.
Ky reagim vjen pas debatit në Kuvend, në seancën e të enjtes së shkuar lidhur me moslejimin e ish kryeministrit Berisha të udhëtojë në SHBA, ka reaguar edhe autoriteti amerikan në Tiranë.