Klubi i njohur anglez i Chelsea-t është nxjerrë zyrtarisht në shitje nga manjati rus, Roman Abramovich. 2 ofertat e para kanë trokitur direkt pas lajmit për shitjen e klubit. Miliarderët Hansjorg Wyss dhe Todd Boehly, i pari zviceran dhe i dyti amerikan, janë duke u përgatitur që të paraqesin një ofertë pas formimit të një konsorciumi që synon ta blejë atë.
Në këtë histori, problemi më i madh mbetet çmimi i lartë që Abramovich po kërkon për shitjen e skuadrës angleze, plot 3 miliard paund.
Gjithsesi miliarderët e interesuar mund të kenë mundësi të negociojnë për çmimin me Abramovich dhe ai mund të pranojë ta ulë atë duke qenë se shitja e Chelsea-t është urgjente. Kjo sepse ekziston frika se Britania mund të sanksinojë apo të ngrijë pasuritë e tij në këtë shtet.
Dje në mbrëmje, qeveria britanike bëri me dije se kishte ngrirë pasuritë e Alisher Usmanov, bosit uzbek i cili ishte investitor në Everton derisa klubi ndërpreu marrëdhëniet me të të mërkurën.
Aktualisht, Wyss dhe Boehly janë të vetmit njerëz që kanë shprehur interesin për të blerë klubin e Chelsea-t. Pasuria e miliarderit amerikan është 5 miliard dollarë, ndërsa e atij zvicerian, 3.8 miliard.
Shitja e Chelseat sipas analistëve pritet të çojë në një rënie të shpenzimeve për transferime te Chelsea, e cila arriti në 2.1 miliard paund në 19 vitet e menaxhimit të Abramovich.
Nga sa është arritur të mësohet së fundmi, Chelsea ka deklaruar një humbje ekonomike prej 207 milion paund, më e madhja që kemi parë ndonjëherë në një klub anglez.