Vetëm gjatë këtij muaji në Bashkinë e Matit janë evidentuar 23 vatra zjarri. Gati çdo ditë zjarrëfikësit, punonjësit e bashkisë dhe banorë të zonave rurale kanë kontribuar në shuarjen e tyre.
Nga ana e saj, Bashkia Mat ka kërkuar nga Policia lokale hetimin dhe zbulimin e autorëve të zjarreve.
Përmes një postimi në rrjetet sociale, kryebashkiaku Agron Malaj ka postuar fotot nga beteja që po bëhet me zjarret, ndërsa ka falenderuar të gjithë ata që po kontribuojnë në shuarjen e tyre nē pyjet dhe kullotat e Matit.
“Temperaturat e larta të muajit Korrik u pasuan me 23 vatra të ndryshme zjarri vetëm në Mat. Sot dua të FALENDEROJ nga zemra forcat zjarrfikëse të Matit, Emergjencat Civile dhe Drejtorinë e Bujqësisë dhe Pyjeve për punën e tyre të palodhur dhe shërbimin që i kanë bërë komunitetit. Ju jeni HERONJTË e vërtetë ndër ne! Faleminderit Heronj”, shkruan Kryetari i Bashkisë së Matit, Agron Malaj.
Një natë më parë, teksa dhjetra punonjës të bashkisë shuanin një vatër zjarri në Qafë Shtamë, drejtori i Bujqësisë Agron Hastoçi tha se edhe zjarri i fundit ishte i qëllimshëm, pasi masivi i përfshirë nga flakët ishte 3 orë larg qendrave të banuara dhe se vetëm ndonjë bari ose grumbullues i bimëve medicinale mund ta ketë shkaktuar zjarrin.