26 korriku shihet si afati fundor për konstituimin e Kuvendit të Kosovës, dhe mjaft ekspertë tani po paralajmërojnë se nëse ai shkelet, vendi do të përballet me një krizë politike dhe juridike të panjohur deri më tani.
Askush nuk ka përgjigje të qartë se çfarë do të ndodhë në Kosovë pas 26 korrikut – datë kur skadon afati prej 30 ditësh që Gjykata Kushtetuese u ka dhënë deputetëve të zgjedhur për të konstituuar Kuvendin, thotë REL.
44 herë kanë dështuar përpjekjet për krijimin e parlamentit të ri, një situatë kjo e paprecedentë. Partitë politike vazhdojnë të fajësojnë njëra-tjetrën për ngërçin dhe të mos lëvizin nga qëndrimet e tyre. Ish-gjyqtarja e Gjykatës Kushtetuese të Kosovës, Gjyljeta Mushkolaj, mendon se barra e përgjegjësisë duhet të kalojë tani mbi presidenten e vendit, Vjosa Osmani, e cila e ka detyrë kushtetuese të garantojë funksionimin demokratik të institucioneve.
Sipas saj, e para e shtetit duhet t’i intensifikojë përpjekjet për arritjen e një konsensusi mes partive politike, dhe nëse kjo dështon, të kërkojë interpretim shtesë nga Gjykata Kushtetuese, për të qartësuar hapat e ardhshëm.
“Gjykata Kushtetuese duhet të jetë më e prerë rreth afatit që e ka përcaktuar dhe pasojave që vijnë pas këtij afati. Roli i Gjykatës Kushtetuese nuk ka përfunduar ende.”
Këshilltari për mediat i Osmanit, Bekim Kupina, tha për Radion Evropa e Lirë se presidentja është duke shqyrtuar mundësitë ligjore për t’iu drejtuar Gjykatës Kushtetuese me kërkesën për sqarim të aktgjykimit, “në mënyrë që të qartësohen pasojat juridike, në rast se Kuvendi nuk konstituohet brenda afatit të përcaktuar nga ajo”.
Ndërkohë në Institutin e Kosovës për Drejtësi (IKD) thonë se konsensusi është e vetmja rrugë për të kapërcyer bllokadën e për të konstituuar Kuvendin deri më 26 korrik, dhe nëse kjo nuk ndodh, vendi do të hyjë në një territor të pashkelur.