Kremlini ka konfirmuar se ka pasur kontakte me Francën për të nisur një dialog diplomatik, ndërsa presidenti ukrainas Volodymyr Zelensky ka deklaruar se dokumentet mbi garancitë e sigurisë nga Perëndimi, në rast të një armëpushimi me Rusinë, janë të gatshme. Ndërkohë, situata në frontin e luftës mbetet e tensionuar, me sulme të reja ruse ndaj qyteteve ukrainase dhe humbje në radhët e Ushtrisë së Ukrainës.
Kontaktet diplomatike Kremlin–Francë
Zëdhënësi i Kremlinit Dmitry Peskov konfirmoi se ka pasur “kontakte” për të nisur një dialog midis Moskës dhe Parisit. “Kontakte ka pasur, dhe nëse kjo do të jetë e nevojshme, do të ndihmojë që të vendoset shpejt një dialog në nivel maksimal”, tha Peskov, sipas agjencisë Ria Novosti. Reuters raportoi se javën e kaluar presidenti francez Emmanuel Macron kishte dërguar në Moskë këshilltarin e tij Emmanuel Bonne. Peskov shtoi se “deri tani nuk ka pasur iniciativa të ngjashme nga kryeqytetet e tjera evropiane.”
Zelensky: Dokumentet për garancitë e sigurisë janë gati
Presidenti ukrainas Volodymyr Zelensky deklaroi se dokumentet mbi garancitë e sigurisë nga Perëndimi janë gati për t’u përdorur si bazë për një armëpushim. “Pa paqe nuk ka asgjë; garancitë e sigurisë të besueshme janë baza e vetme që mund të sigurojë paqe dhe të pengojë rusët që të shkelin marrëveshjet me këtë apo atë sulm, me këtë apo atë operacion të tyre hibrid. Tani nuk ka më asnjë vend në Europë që të mos e dijë se çfarë është ndërhyrja ruse dhe çfarë mund të jenë operacionet e tyre të destabilizimit”, theksoi Zelensky.
Sulme me dron në Zaporizhzhia
Forcat ruse sulmuan qytetin Vilniansk në rajonin e Zaporizhzhias me dronë, duke lënduar katër persona, përfshirë një fëmijë të moshës dy vjeç. Sipas Ukrinform dhe njoftimeve të kryetarit të Administratës Ushtarake Rajonale, Ivan Fedorov, disa shtëpi private dhe ndërtesa shoqëruese u dëmtuan nga sulmet. Të lënduarit po marrin trajtim mjekësor.
Humbje në radhët e Ushtrisë së Ukrainës
Ushtria ukrainase njoftoi se ekuipazhi i një helikopteri Mi-24 ka vdekur gjatë një misioni luftarak në rajonin e Khersonit. Sipas raportimeve, ata kanë qenë “vërtet patriotë dhe oficerë të denjë”, por numri i saktë i viktimave nuk është bërë publik.
“Ende rrugë e gjatë për paqen”
Ministri i Jashtëm rus, Serghei Lavrov, paralajmëroi se ka ende “shumë rrugë për të bërë” për të arritur paqe në Ukrainë. Ai theksoi se negociatat vazhdojnë dhe se një raund i dytë diskutimesh u mbajt në Abu Dhabi, por procesi mbetet i gjatë dhe i ndërlikuar./La Stampa