Dhimbja është e madhe për prindërit, të afërmit dhe banorët e zonës. Nënat e motrat lotojnë pa pushim, por janë baballarët e vëllezërit që u japin zemër atyre, me shpresë se të zhdukurit ndodhen në një burg të sigurisë së lartë, në Korfuz të Greqisë.
Letrat, telegramet, telefonatat, kërkimet nuk ndalen që nga 9 Marsi i vitit 1996. Mediat e kohës dhanë lajmin e zi se në Kanalin e Otrantos, teksa udhëtonin drejt Italisë, janë mbytur në det 32 djem e burra nga Dibra. Dibranët kërkonin të vërtetën e atij lajmi të keq, por as sot e kësaj dite ata nuk dinë rreth fatit të njerëzve të tyre të dashur.
I vetmi lajm zyrtar i asaj kohe është njoftimi i Policisë së Dibrës se Sulejman Çoku ishte gjetur në brigjet italiane. Ish ministri i Rendit të asaj kohe, në një takim që pati në Peshkopi, me familjarët e të “zhdukurve”, u kundërshtua nga familjarët, me argumentin se djemtë e tyre ndodhen të burgosur në Kretë dhe për këtë ato thanë se janë parë në ekranet e TV-ve të shtetit fqinj.
“Kemi bërë mjaft përpjekje për të mësuar rreth fatit të djemve tanë, por shteti është mjaftuar me shpalljen e tyre të mbytur në det. Por ne dyshojmë se ata janë gjallë të gjithë, pasi kufoma e Sulejman Qokut që u gjet në brigjet e Italisë, ishte e lidhur pas një mjeti shpëtimi. Ne kemi informacione të shumta se ata janë gjallë dhe mbahen në burg. Ndaj i kërkojmë qeverisë të mundësojë gjetjen e tyre”, janë shprehur banorët e Maqellarës asokohe.
Të zhdukurit e atij viti, disa prej tyre, kishin fëmijë që tashmë janë rritur pa kujdesin prindëror dhe nuk dinë rreth fatit të baballarëve të tyre.
Të tjerë banorë kanë pohuar se: “Dy nga të konsideruarit si të zhdukur i kanë telefonuar një radio private në Maqedoni dhe janë shprehur se janë të izoluar në burgun e Korfuzit”.
Të zhdukurit e 9 marsit 1996:
1. Mehmet Bici
2. Arshi Kaferi
3. Sigurim Keshi
4. Baudin Keshi
5. Qemal Veizi
6. Naim Qoku
7. Dashamir Qoku
8. Ulsi Rama
9. Asllan Istrefi
10. Miri Kryemadhi
11. Gjyzel Fida
12. Belul Hazisi
13. Hysen Zerja
14. Vullnet Bunguri
15. Dashuri Qoku
16. Mysli Bunguri
17. Luftim Istrefi
18. Gëzim Jaho
19. Zenel Kaferi
20. Fadil Hamja
21. Shuip Beqa
22. Fatos Beqa
23. Mustafa Elezi
24. Hazbi Elezi
25. Ramis Haxhiu
26. Sulejman Shahini
27. Urim Tonuzi
28. Sajmir Hasani
29. Hajri Shira
30. Sajmir Salkurti
31. Altin Harkorja
32. Abdyl Jaqe